இனிய ஆங்கிலப் புத்தாண்டு 2025

 வலைப்பூ நண்பர்கள் அனைவருக்கும் உளமார்ந்த ஆங்கிலப் புத்தாண்டு நல்வாழ்த்துகள்!

யானை!

 

யானை!

ஆனை!ஆனை!அழகர் ஆனையென 

மழலைப் பருவத்தில் மனதில் பதிந்தாய்நீ!

அப்பாவும் தாத்தாவும்  ஆனையென தாம்மாறி  

அம்பாரி விளையாட எனைஅமர்த்திடுவார் தம்முதுகில்!

காட்டு விலங்காம் களிறினைக் காணும்

வேட்கை என்னுள் விளைந்தது அன்று!

விழைவை அறிந்ததோ  வேழம் ஒன்று?

கழுத்துமணி யொலிக்க கைம்மா(ன்) வந்தது!

 

தூணெனக் கால்களும், தூக்கியத் துதிக்கையும்

சேம்பின் இலைபோல் செவிகள் அசைய

பெருத்த உருவம் பெற்ற அக்கரிமுகம்

பாகனின் சொல்லுக்கு பணிந்து நடந்தது!

அரிசியொடு வெல்லம் அளித்தனர் பெற்றோர்!

வாரி உண்டு வாழ்த்தியது என்னை!

ஏற்றி அமர்த்தினர் என்னை அதன்மேல்

கதறிநான் பயந்தது காலமெலாம் நினைவில்!

 

இலக்கியங்கள் பலவற்றில் இடமுண்டு யானைக்கும்

சிலவற்றை  மட்டுமிங்கே செப்பிட விழைகின்றேன்!

காற்றில் அலையும் கார்முகில்  கூட்டத்தைக்

களிறுகளின் விளையாட்டாய்க் கண்டனன் காளிதாசன்!

 

 முழக்கம் எழுப்பும்  முகில்களின் மோதலை

வேழங்களின்  போரெனவே விளம்பினான் வால்மீகி!

நிலவின் பிறையென நீண்ட மருப்பால்

புலியையும் வீழ்த்திடும் பலமிகு வேழமும்!

 

உருவில் பெருத்தோர்க்கு உவமையும் யானையே!

பெரும்பசிக்கு  இட்ட பெயரிலும் யானையே!

செருவினில் வெற்றிகளைச் சேர்த்தது யானையே!

முருகனுக்கு மூத்தவனின் முகவடிவும் யானையே!

 

உணர்ச்சிகளில் மனிதனுக்கு ஒத்ததது  யானை!

வாழிடம் செல்லும் வழிமறவாது யானை!

பெருமையும் புனிதமும் நிறைந்த இவ்விலங்கினை

அருகிடாமல் காப்பது அனைவரின்  கடமையன்றோ?

                                                                                                    -காரஞ்சன்(சேஷ்)

பல்லுயிர் பாமாலை!

வலைப்பூ அன்பர்களுக்கு வணக்கம்!

ஒரு நீண்ட இடைவெளிக்குப் பிறகு மீண்டும் என்னுடைய வலைப்பக்கத்தின் மூலம் உங்களை சந்திக்க வருவதில் மகிழ்வடைகிறேன்! என் படைப்புகளைப் பகிர விழைகிறேன்.

படைப்புகள் குறித்து தங்களின் கருத்துரைகளை அறிய ஆவல் கொண்டுள்ளேன்!

புதுவை அரசின் சுற்றுச் சூழல் துறை  நடத்திய கவிதைப் போட்டியில் 

மூன்றாம் பரிசுக்குத் தெரிவு செய்யப்பட்ட என்னுடைய கவிதையினைப் பகிர்ந்துள்ளேன்.                   

                         பல்லுயிர் பாமாலை!

 

உயிர்கள் அனைத்தும் ஒன்றையொன்று சார்ந்தநிலை

சுழலும் இப்புவியில் சுழற்சியென நிலைப்பதுவே!

 

சுற்றுச் சூழலிலே சுயநலத்தால் மனிதனவன்

மாற்றம் விளைவித்தால் மன்னுயிர்கள் என்னாகும்?

 

நெகிழிப் பயன்பாட்டால் நிலமகளின் நெஞ்சடைத்தோம்!

வான்நீரை அவள்பருக வழியின்றிப் போனதுவே!

 

அடுக்குமாடி குடியிருப்பால் ஆக்கிரமிப்பில் நீர்நிலைகள்!

நீர்வாழ் உயிரினங்கள் வேறெங்கு போய்வாழும்?

 

வனங்களை அழிப்பதனால் வாழிடமின்றி காட்டுயிர்கள்

ஊருக்குள் புகுந்து உண்டாக்கும் பெருஞ்சேதம்!

 

இயற்கைஉரம் தவிர்த்து இடுகின்றார் நஞ்சதனை!

விளைநிலங்கள் கெடுவதுடன் விரைந்தழியும் நல்லுயிர்கள்!

 

மின்மினியும், பொன்வண்டும், கருடனும் பருந்தினமும்

காணக் கிடைக்காத காரணம் இவையன்றோ?

 

வாகனப் பெருக்கத்தால் வான்முட்டும் பேரிரைச்சல்!

கரும்புகை கலப்பதினால் காற்றுவெளி மாசாகும்!

 

ஆலைக் கழிவுகள் நீர்நிலை சேர்வதனால்

ஆழியும் நஞ்சாகி அருகிடுதே கடலுயிர்கள்!

 

உறைந்திருந்த பனிப்பாறை உருகத் தொடங்குவது

காலநிலை மாற்றத்தால் கவலைதரும் நிலையன்றோ?

 

உறைநிலையில் ஒளிந்திருந்த கிருமிகளால் நோய்பலவும்

உருவாக சாத்தியங்கள் உண்டெனெவே அஞ்சிடுவோம்!

 

இயற்கையின் முன்னே எள்ளளவு மனிதரெலாம்!

இயைந்து வாழ்ந்தால் இன்பமுண்டு எந்நாளும்!

 

பல்லுயிர் ஓம்புதலில் பங்கெடுப்போம் மகிழ்வுடனே!

அடுத்தடுத்த தலைமுறைக்கு அளித்திடுவோம் நற்புவியை!

 

                                        -காரஞ்சன்(சேஷ்)

வடம் பிடித்து, தடம் பதித்து, இடம் பிடிக்க!

திரித்த கயிறுகளின் திரட்சி

தேருக்கு வடமாச்சு!

சிரித்த முகத்துடன்

சிறுவர்களின் முயற்சி

சிந்தைக்கு விருந்தாச்சு!

வடம் பிடித்த நீங்கள்

வாழ்வில் தடம் பதித்து

தனக்கென ஒரு

தனிஇடம்பிடிக்க

இறையருள் என்றும் துணை நிற்க!

-காரஞ்சன்(சேஷ்)

 பட உதவி: திரு வெங்கட் நாகராஜ் அவர்களுக்கு நன்றி!

கரையாத துயருமுண்டோ?

                                      

 கரையாத துயருமுண்டோ?

ஊதிப்பெரிதாக்கி
உருவான நீர்க்குமிழி
காற்றில் கரைகிறதே
கணநேரத்தில்!

உடையாத மனமிருந்தால்
கடுந்துயரும் கரைந்திடுமே
கால வெள்ளத்தில்!
-காரஞ்சன்(சேஷ்)

திரு வெங்கட் நாகராஜ் அவர்களுக்கு என் உளமார்ந்த நன்றி!

அகலட்டும் அல்லல்கள்!

                                           அகலட்டும் அல்லல்கள்!

கொளுத்தும் வெயிலுக்கு

வெளுத்த உடை!

தேர்காண வந்தோரின்

வேர்வை போக்கிட

விரிந்த கரங்களில்

விற்பதற்காய் விசிறிகள்!

அரங்கனின் பார்வைக்கு

அவர் விசிறி!

செய்யும் தொழிலதனை

தெய்வமாய் நினைப்பதால்

அரங்கனும் ஆவாரோ

அவரின் விசிறி?

கடைக்கண் பார்வைக்குக்

காத்திருக்கும் அவருக்கு

அரங்கன் அருளால்

அகலட்டும் அல்லல்கள்!

                       - காரஞ்சன்(சேஷ்),

            திரு வெங்கட் நாகராஜ் அவர்களுக்கு என் உளமார்ந்த நன்றி!

       வலையுலக நண்பர்கள் அனைவருக்கும் என் புத்தாண்டு நல்வாழ்த்துகள்!

                       நலங்களும் வளங்களும் பெருகிடும் ஆண்டாய் இப்புத்தாண்டு அனைவருக்கும் அமைய
                      
                       எல்லாம் வல்ல இறைவன் அருளட்டும்!

                                                                                                   -காரஞ்சன்(சேஷ்)

   பட உதவி: கூகிளுக்கு நன்றி!

பொங்கலோ பொங்கல்!

புவிவாழ மேழிதனை
புயமேந்தும் உழவர்கள்
தவிக்கின்றார் துயரினிலே
செவிமடுப்போம் துயர்களைய!

தீயினில் தூசாக
தீமைகள் மறையட்டும்!
போயின துயரென்று
போகியில் துவங்கிடுவோம்!

பகலவன் வரவாலே
பனிவிலகல் போலிங்கு
இனிவரும் நாளெல்லாம்
இன்பங்கள் பெருகட்டும்!

நீருண்ட மேகங்கள்
வேருண்ண நீர்தந்து
விளைச்சலைப் பெருக்கி -மன
உளைச்சலைப் போக்கட்டும்!

செந்நெல் பெருகி
மங்கல மஞ்சளொடு
பொங்கட்டும் மகிழ்வெங்கும்
பொங்கலோ பொங்கலென!

இனிவரும் நாளெல்லாம்
இன்பம்  பெருகவென்று
திளைத்திடுவோம் மகிழ்வினிலே
தித்திக்கும் பொங்கலுடன்!

துன்பமும் துயரமும்
தொலையட்டும் இந்நாளில்!
மங்கல ஒலியெழுப்பி
மகிழ்ந்திருப்போம் அனைவருமே!


வலைப்பூ நண்பர்கள் அனைவருக்கும் என் இனிய பொங்கல் திருநாள் நல்வாழ்த்துகள்!

-காரஞ்சன்(சேஷ்)

பட உதவி: கூகிளுக்கு நன்றி!

அறுபதில் பாதியாய் அமைந்த துன்முகியே!-காரஞ்சன்(சேஷ்)

நீர்வளம் பெருகி ஏர்நிலை உயர்ந்திட

உறுதுயர் களைய உள்ளங்கள் உருகிட

ஊர்கள் அனைத்தும் உயர்நிலை அடைந்திட

வருவாய் பெருகி வறுமை அகன்றிட

ஊறிடும் பாசத்தால் உறவுகள் பெருகிட

பேரொடு புகழும் பெருவாழ்வும் பெற்றிட

அறுபதில் பாதியாய் அமைந்த துன்முகியே

பேரருள் வழங்கி பெருமைகள் சேர்த்திடுவாய்!

அனைவருக்கும் இனிய துன்முகி ஆண்டு சித்திரைத் திருநாள் வாழ்த்துகள்!
-காரஞ்சன்(சேஷ்)

பட உதவி: கூகிளுக்கு நன்றி!

பொங்கல் வாழ்த்து!-காரஞ்சன்(சேஷ்)

பொங்கலோ பொங்கல்!

 

 

செங்கரும்பின் சுவையுடனே

பொங்கட்டும் புதுப்பொங்கல்!

மங்கலங்கள் பலபெருகி

மக்களெலாம் மகிழ்வுறுக!

தலையாய உழவெங்கும்

தழைக்கட்டும் தரணியிலே!

மாசிலாச் சுழல்

மலரட்டும் புவியெங்கும்!

எல்லோர்க்கும் மகிழ்வளிக்கும்

இயற்கைவளம் காப்போம்!

பொங்கல் திருநாளில்

பொங்கட்டும் மகிழ்வெங்கும்!

பொங்கலோ பொங்கலென

மங்கலக் குரலெழுப்பி

மகிழ்ந்திடுவோம் இந்நாளில்!

பொங்கலோ பொங்கல்!

--காரஞ்சன்(சேஷ்)
பட உதவி: கூகிளுக்கு நன்றி!

வீறு கொண்டு எழு மனமே!- காரஞ்சன்(சேஷ்)

                                             
                                வீறு கொண்டு எழு மனமே!

சேற்று வயலினிலே செந்நெல் விளைவிக்க
ஏரோட்டி, எருவிட்டு, நாற்றுநட்டு, நீர்பாய்ச்சி
நாளெல்லாம் உழைத்தாலும் பயிரிடையே வளர்கின்ற
களையெடுத்த பின்தானே காண்கிறோம் நல்விளைச்சல்!

பாடுபட்டு விளைத்த பயிரன்றோ சுதந்திரமும்!
ஊழல் வளர்தலும், சுற்றுச் சூழல் கெடுதலும்
தீயெனப் பரவும் தீவிரவாதமும், பாலியல் வன்முறையும்,
தேசத்தின் வளர்ச்சிக்கு தேக்கநிலை அளிக்காதோ?

வண்ணப் பறவைகள் வாழ்ந்திடும் கூடு!
நம்முள் பிரிவுகள் நீர்மேல் கோடு!
உறுபசியும், செருபகையும், ஒவ்வாப் பிணிகளையும்
வேருடன் களையெடுக்க விழைந்து முன்வருவோம்!

உள்ளுவதெல்லாம் உயர்வுள்ளல், உள்ளத்துயர்வே உயர்வென்ற
வள்ளுவப் பெருந்தகை வாக்கினை நாம்போற்றி
சிந்தையொடு செயலும் ஒன்றுபட உழைத்திட்டால்
விந்தைகள் பலவிளையும்! வீறு கொண்டு எழுமனமே!

                                                                                                     
பட உதவி: கூகிளுக்கு நன்றி!

அனைவருக்கும் என் இனிய ஆங்கிலப் புத்தாண்டு நல்வாழ்த்துகள்!

  -காரஞ்சன்(சேஷ்)

இனிய தீபாவளித்திருநாள் நல்வாழ்த்துகள்!-காரஞ்சன் (சேஷ்)

வலைப்பூ நண்பர்கள் அனைவருக்கும்  என் இனிய

தீபாவளித் திருநாள் நல்வாழ்த்துகள்!

         

     புத்தாடை, மத்தாப்பு, பொங்கிவரும் புன்சிரிப்பு                  

   எத்திக்கும் ஒளிபரப்பும் ஏற்றிவைத்த தீபங்கள்     

   தித்திக்கும் இனிப்புவகை, தீபாவளித் திருநாளில்!    

   இல்லங்கள்  தோறும் இன்பம் தழைக்கட்டும்!  

   நல்லோர்கள் ஆசிகளால் நம்வாழ்வு சிறக்கட்டும்!

   பொல்லா எண்ணங்கள் இல்லாமல் மறையட்டும்!   

  எல்லோரும் இன்புற்று இந்நாடு உயர்வடைய

  பல்லாண்டு வாழ்கவென பகிர்ந்திடுவோம் வாழ்த்துகளை!

                                                                                                     

-காரஞ்சன் (சேஷ்)

பட உதவி: கூகிளுக்கு நன்றி!

வாழ்க சுதந்திரம்! வளர்க நம்தேசம்! -காரஞ்சன் (சேஷ்)

வாழ்க சுதந்திரம்! வளர்க நம்தேசம்!

 

 

 

அடிமைத்தளை அகன்று
ஆயின ஆண்டுகள்
அறுபத் தொன்பது!


இந்நாட்டின் விடுதலைக்கு
தன்னலமற்ற தலைவர்கள்
ஈந்தனர்  இன்னுயிரை!

முன்னோர்களின் தியாகத்தை
இன்றைய தலைமுறைக்கு
இந்நாளில் எடுத்துரைப்போம்.

இனிவரும்காலம்
இளைஞர்கள் காலம்!

வன்முறை அகற்றிடுவோம்!
வனங்களைக் காத்திடுவோம்!

மாசிலாச் சூழல்
மலர்ந்திட வழிகாண்போம்!

உழவுத் தொழிலின்
உயர்வினைப் போற்றுவோம்!

அனைவருக்கும் கல்வி
அளித்திட வகைசெய்வோம்!

போதைப் பழக்கத்தை
போக்கிட வழிகாண்போம்!

தன்னிறைவுடன் தாய்த்திருநாடு
என்றும் மிளிர்ந்திட

 இந்நாளில் கொடியேற்றி
ஏற்றிடுவோம் உறுதிமொழி!

அனைவருக்கும் சுதந்திரத் திருநாள் வாழ்த்துகள்!

-காரஞ்சன்(சேஷ்)

பட உதவி: கூகிளுக்கு நன்றி!

எத்தனை கோடி உள்ளங்களைக் கவர்ந்தாய்! ஏனோ இப்படி சட்டென மறைந்தாய்?- காரஞ்சன்(சேஷ்)

எத்தனை கோடி உள்ளங்களைக் கவர்ந்தாய்!

ஏனோ இப்படி சட்டென மறைந்தாய்?

 தென்கோடித் தமிழரே!- நீர்

எத்தனைகோடி இன்னுளம் கவர்ந்தீர்!

சாதாரணனும் சாதிக்க முயன்றால்

சரித்திரம் படைக்கலாம் என்பதற்கு

சான்றாய்த் திகழ்ந்தீர்!

பொய்யாமொழிக்கேற்ப

புவியில் வாழ்ந்தவரே!

தன்னம்பிக்கையும்

தளரா முயற்சியும்

தரணியில் உமை உயர்த்தின!

எளிமைக்கு இலக்கணமே!

எம் நாட்டுச்  சுடரொளியே!

ஏவுகணை நாயகனே!

விண்வெளி ஆய்வில்

வியக்க வைத்தாய் உலகத்தை!

 அடிமை விலங்ககற்றி

ஆனந்த சுதந்திரம்

அடைந்து விட்டோமென

பாடிய பாரதி- அதைப்

பார்க்குமுன்னே மறைந்தான்!

இரண்டாயிரத்து இருபதில்

இந்தியா வல்லரசாக

எந்நாளும் கனவுகண்டீர்!

பாரதிபோல் ஏனோ அதைப்

பார்க்குமுன்னே  மறைந்தீர்!

மறைந்தீர் எனக்கேட்டு

உறைந்தனர் மக்கள்!

மெழுகைச் சுமந்து

அழுதனர் பிள்ளைகள்!

ஆழ்ந்தனர் துயரில்!

 எத்தனையோ மனிதர்கள்

பிறக்கலாம் இப்புவியில்!

இறக்கலாம் இப்புவியில்!

கலாம்போல் ஒருவரை

இனி எப்போது பார்க்கலாம்?

செயற்கைக்கோள் மட்டுமின்றி

செயற்கைக்கால் வடிவமைத்தீர்!

செயற்கரிய செயல்களால்

உயர்ந்திட்டீர் உளங்களிலே!

சம்பவங்களிலும் சரித்திரம் படைத்தவர் நீர்!

வருங்கால பாரதத்தை

வடிவமைக்கும் சிற்பிகளின்

சிந்தனையைத் தூண்டி

சிறகடிக்க விட்டவரே!

வல்லரசாக்க வழிகாட்டி நீரன்றோ!

கடைசிப் பயணத்தைக்

கண்ணுற்றபோது கனத்தது இதயம்!

கண்ணீர் பெருகியது!

நேசத்தின் வெளிப்பாடாய்

தேசமே அழுதது!

வாழ்வதற்குகந்த பூமி

வாய்ப்பதாக ஒரு காட்சி!

அமைதியாக நடந்த

அஞ்சலியே அதன் சாட்சி! 

விண்ணில்  இன்று எழுகின்ற வெண்ணிலவே!

மண்ணுக்குள் மறைந்த இந்த மாமனிதர்

எண்ணம்போல் எம்தேசம் மிளிர்வதை - நீ

கண்ணுறும் காலம் கட்டாயம் தூரமில்லை!

 -காரஞ்சன்(சேஷ்)

இசையெனும் அமுதினில் இவரொரு பாகம்! எமனுக்கும் ஏனோ இவரிடம் மோகம்? -காரஞ்சன்(சேஷ்)

                                      இசையெனும் அமுதினில் இவரொரு பாகம்!

                 எமனுக்கும் ஏனோ இவரிடம் மோகம்?

குப்தர்கள் காலம் பொற்காலம்

       இந்திய வரலாற்றில் !

உந்தன் காலம் பொற்காலம்

      இசையுலக வரலாற்றில் !

எங்கிருந்தோ வந்தாய்!

   இசைக்கலைஞன்    நான் என்றாய்!

இங்குனையே நாம்பெறவே

   என்னதவம் செய்தோமோ!

செந்தமிழ் வரிகளுக்கு

    செவிகுளிரும் இசைசேர்த்துத்

தெவிட்டாத தெள்ளமுதைத்

    தேன்மழையாய்த் தவழவிட்டாய்!

இன்றைய தொழில்நுட்பம்

    இல்லாத காலத்தே

நுட்பங்கள் பற்பலவும்

    நும் இசையில் நுழைத்தவரே!

வளர்ந்த நிலையில்- நீர்

   வடிவமைத்த பாடல்கள்

வளரும் பருவத்தே- நாங்கள்

     வாயாரப் பாடியவை!

எதார்த்த வாழ்வியலை

எடுத்துரைத்த காலத்தில்

இசைக்குத் தளமிருந்தது!

கவிஞர்க்குக்  களமிருந்தது!

மெல்லிசையின் வருடலிலே

சொல்லாட்சிக் கவிஞர்கள்

சொக்கிநின்ற தாக்கத்தில்

ஆக்கினரே அரும்பாடல்!

காதலோ, ஊடலோ, சாடலோ

மோதலோ, தேடலோ,ஆடலோ

ஏற்ற  பலபாடல்கள்

சாற்றின உம் திறத்தை!

உந்திய சிந்தனையால்

உருவான பாடலுக்கும்

சந்தம் பலதந்து

விந்தை புரிந்தவர் நீர்!

இறவாப் பாடல்கள்

இரட்டையரின் கைவண்ணம்!

தனித்து நின்றும் -நீர்

தணியாத  இசைவெள்ளம்!

மயக்கமா!கலக்கமா! பாடல்

மற்றொரு கவிஞனை

பெற்றெடுத்துத் தந்தது!

பேரெடுக்க வைத்தது!

பாடிய குயில்களுக்கு

பண்ணமைத்துத் தந்தவர் நீர்!

எண்ணங்களுக்கெல்லாம்

இசைவடிவம் தந்தவர் நீர்!

நினைத்தாலே இனிக்கும்!

நெஞ்சமெலாம் நிறைந்திருக்கும்!

இசைவானில் உன்பாடல்

திசையெங்கும் ஒலித்திருக்கும்!

தமிழ்த்தாய் வாழ்த்து

தரணியிலே ஒலிக்கும்வரை

உந்தன் புகழும்

உலகெங்கும் நிலைத்திருக்கும்!

என்னுளம் கவர்ந்த

மென்னுளம் கொண்டவனின்

ஆன்மா அமைதிபெற

அருளாயோ இறைவா நீ!

 -காரஞ்சன்(சேஷ்)

பட உதவி: கூகிளுக்கு நன்றி!

கவிதைப்போட்டியில் முதற்பரிசு! -காரஞ்சன் (சேஷ்)

வணக்கம் நண்பர்களே!

திருவாளர்கள் ரூபன் மற்றும் யாழ்பாவாணன் அவர்கள் இணைந்து நடத்திய “உலகம் தழுவிய மாபெரும் கவிதைப் போட்டி 2015”ல் எனக்கு முதற் பரிசு கிடைத்துள்ளது என்பதனை மிகவும் மகிழ்ச்சியுடன் தெரிவித்துக் கொள்கிறேன். அவர்கள் இருவருக்கும், மற்றும் எனது கவிதையை பரிசுக்கு தெரிவுசெய்த நடுவர்களுக்கும் எனது நெஞ்சார்ந்த நன்றிகள்! பரிசினை வென்றுள்ளவர்களுக்கும், கலந்துகொண்டோர்க்கும் எனது மனமார்ந்த பாராட்டுக்கள்!

பரிசு அறிவிற்பிற்கான இணைப்பு இதோ

http://www.trtamilkkavithaikal.com/2015/06/2015.html

பரிசிற்குத் தெரிவுசெய்யப்பட்ட எனது கவிதை கீழே!
 

இணையத் தமிழே இனி!

தொட்டில் பருவத்தே தொடங்கியதே தமிழுணர்வு!

மட்டிலா மகிழ்வுடனே மழலைக்குத் தமிழமுதை

ஊட்டிடுவாள் அன்னையவள் ஊற்றெடுக்கும் தாலாட்டால்!

எம்மொழிகள் செம்மொழியாம் என்றாய்ந்து பார்க்கையிலே

எம்மொழிதான் செம்மொழியே-- ஏற்புடைத்த பழமையினால்!

 

மூவேந்தர் காலத்தை முத்தமிழால் உணர்ந்தோம் நாம்!

ஐம்பெரும் காப்பியங்கள் அணிந்திட்டாள் தமிழன்னை!

தோய்ந்ததமிழ்ப் புலவரெலாம் தொண்டாற்றி தமிழ்வளர்த்தார்!

தேய்கின்ற திங்களுமே திரும்பிடுதே முழுநிலவாய்!

தேயாமல் தீந்தமிழை திக்கெட்டும் வளர்த்திடுவோம்!

 

ஒற்றெழுத்துப் பிழையாலே உருக்குலையும் தமிழ்ச்சொல்போல்

ஒற்றுமை குன்றியதால் உருவிழந்தோம் தமிழினமே!

தாய்மொழியைக் கற்றிடவே தயங்குவதும் சரிதானோ?

சேய்களின் நாவெல்லாம் செந்தமிழும் தவழாதோ?

 

பைந்தமிழைப் பயிற்றிட பற்பல வழி செய்வோம்!

 

தேன்தமிழ்ப் பாடல்கள் திரையிசையில் நாம்கேட்டோம்!

இன்றைய தலைமுறைக்கு இல்லையந்த பேரின்பம்!

இன்றைய கவிஞர்களே! இயற்றுங்கள் நற்பாடல்!

சேய்களின் செவிகளிலே செந்தமிழைச் சேர்த்திட்டால்

தாய்மொழியும் வளராதோ? தமிழரினம் மகிழாதோ? 

 

கணிணிகளில் பல்வகையும் கைப்பேசி வகைகளுமே

பிணையத்தில் இணைந்து இணையமான இந்நாளில்

அனைத்திலும் தமிழ்தவழ ஆக்கிடுவோம் மென்பொருட்கள்!

இணையத்தில் தமிழ்வளர்த்து இசைபட வாழ்ந்திடுவோம்!

இணைத்திடுமே தமிழர்களை- இணையத்தமிழே இனி!

                                                              -காரஞ்சன்(சேஷ்)